06/02/2026
#اسلام آباد میں امام بارگاہ کے قریب دھماکہ، متعدد افراد شہید و زخمی:::
اسلام آباد کے علاقے ترلائی/شہزاد ٹاؤن میں واقع ایک امام بارگاہ کے قریب جمعہ کی نماز کے دوران ہونے والے دھماکے میں متعدد افراد شہید اور درجنوں زخمی ہو گئے ہیں۔
پولیس اور ریسکیو حکام کے مطابق دھماکہ قصرِ خدیجۃ الکبریٰ امام بارگاہ کے مرکزی دروازے کے قریب ہوا۔ ابتدائی تحقیقات کے مطابق یہ واقعہ خودکش حملہ ہو سکتا ہے، تاہم حکام کا کہنا ہے کہ حتمی نتائج تحقیقات مکمل ہونے کے بعد سامنے آئیں گے۔
جانی نقصان::
اطلاعات کے مطابق دھماکے میں 31 افراد جان سے گئے جبکہ 169 افراد زخمی ہوئے ہیں۔ کئی زخمیوں کی حالت تشویشناک بتائی جا رہی ہے، جس کے باعث ہلاکتوں میں اضافے کا خدشہ ظاہر کیا جا رہا ہے۔
امدادی کارروائیاں::
#دھماکے کے فوراً بعد ریسکیو 1122، پولیس اور قانون نافذ کرنے والے ادارے موقع پر پہنچ گئے۔ زخمیوں کو اسلام آباد کے مختلف اسپتالوں میں منتقل کیا گیا، جہاں
پاکستان انسٹیٹیوٹ آف میڈیکل سائنسز (پمز)
پولی کلینک ہسپتال
سی ڈی اے ہسپتال
میں ایمرجنسی نافذ کر دی گئی ہے۔
سیکیورٹی صورتحال::
واقعے کے بعد علاقے کو گھیرے میں لے کر سرچ آپریشن شروع کر دیا گیا ہے جبکہ وفاقی دارالحکومت میں سیکیورٹی ہائی الرٹ کر دی گئی ہے۔ بم ڈسپوزل اور فرانزک ٹیمیں شواہد اکٹھے کر رہی ہیں۔
حکام کا مؤقف:::
اسلام آباد پولیس کے مطابق حملہ آور کو امام بارگاہ کے اندر داخل ہونے سے پہلے روک لیا گیا تھا، جس کے باعث مزید بڑے جانی نقصان سے بچاؤ ممکن ہوا۔ تاحال کسی تنظیم نے حملے کی ذمہ داری قبول نہیں کی۔
