30/11/2025
وانت بتمدد كابلات في الموقع ابقي سيب كوربة من كل كابل تحت اللوحات (و الكوربة هنا مش في مصر الجديدة 😁)
🔌 ليه لازم نسيب Spare للكابلات تحت اللوحات والكوفريهات وولاعات الانارة (لوحات انارة الموقع العام)؟
في شغل الشبكات الخارجية وبالذات في كابلات الكهرباء، هتلاقي دايمًا لفة كابلات زيادة متسابّة تحت اللوحات والبيلرات (اللفة الزيادة دي بنسميها بلغة دارجة بيننا ... كوربة كابلات) … واللفة دي مش منظر!
دي اسمها Spare / Slack، ومن غيرها التنفيذ والصيانة يبقوا معرضين للمشاكل كل شوية.
💡 طب إيه فايدة الكوربة دي؟
1️⃣ في حالة الكابلات الكبيرة (LV/MV)
لو احتجت تعمل Re-termination لأي سبب (قصر، سخونة، كابل اتقطم)،
فالبالتالي وجود Slack او طول اضافي بتقدر ساعتها تحفر تحت اللوحة وتسحب من الطول الاضافي اللي تحت اللوحة من غير ما تغير الكابل بالكامل او تعمل وصله!
2️⃣ يقلل الإجهاد على الكابل
اللفة الزيادة بتمنع شدّ الكابل أو الضغط عليه عند دخول اللوحة،
وده بيطوّل عمره وبيحافظ على العزل.
3️⃣ مهم للقياس والاختبار قبل الربط
أوقات بنحتاج نحرّك الكابل أو نبدّل ترتيب الفازات…
الـ Spare بيسهّل الحركة دي من غير تكسير أو شد.
4️⃣ عشان أي تعديل مستقبلي
ممكن بعد فترة تحتاج توسّع، تغيّر مسار، تركّب لوحة جديدة…
لو مفيش Spare هتضطر تشد كابلات من أول وجديد!
📌 الخلاصة:
اللفة الزيادة (الكوربة) اللي تحت اللوحة دي مش “كابل مرمي” ولا “شغل زيادة”…
ده تأمين للمشروع، وذكاء في التنفيذ، وضمان إن الصيانة بعد كده ما تبقاش كابوس.
🫡♥️
