21/05/2026
1：好多家庭請工人姐姐時，擔心呢樣擔心嗰樣，「會唔會走佬？」「會唔會借財仔？」最近政府推出新例，加強規管財仔，嘗試去減少大家嘅憂慮。
2：財庫局分兩階段推出新措施，由第一階段，即係今年8月開始，為低收入人士借P Loan時設「還款佔入息比率（DSR）」上限。
每月收入6000蚊以下，DSR上限35％；收入6001蚊至1.2萬，上限40%。同埋，財仔批P Loan時，還款期唔可以長過借款人僱傭合約剩低期限。
3：咁即是話，如果以外傭最低工資月入5100蚊計，DSR上限35%（即每月還款上限1,785元），以30%年利率、分12期還款，佢最多大約可以借18,310元。
再極端啲，假如有個外傭，臨完約前一個月佢走去借錢，新例之下，佢可以借到嘅錢，係2000蚊都冇。
順手計埋，月入1.2萬元（DSR上限40%），同樣年息30％，分12個月，佢最多可以借49,237元 。
4：借款額限死咗同時，以往有唔少情況係，外傭借錢時，冇經僱主同意，就填咗僱主做貸款諮詢人。到財仔要追數時，就走去煩個僱主。以後都唔suppose再有呢個麻煩出現，因為新例係禁止財仔，再要求借款人提供「貸款諮詢人」，即係唔可以再交名；同時，如果債仔唔見人，放債人亦唔可以再聯絡諮詢人。
5：至於第二階段，就會係2027年6月起，所有有做P Loan嘅財仔，都必須每30日內向「信資通」上報借款人資料。另外，私貸總額達5,000萬嘅財仔，或者有做低薪人士（月入少於12,000蚊）生意嘅財仔，仲會被強制加入「信資通」去查閱信貸報告。
換句話講，財仔計數嗰陣，要睇埋姐姐喺銀行同其他財仔嘅所有欠債。外傭收入普遍喺6,000至8,000蚊左右，計埋新例嘅還款上限，基本上佢哋借咗一兩間財仔，條數已經爆咗，想再借都借唔到。
（另一方面，據政府數據，目前主打低薪借款人市場財務公司有230間，之後佢哋都好難做生意，所以應該會有唔少財仔離場唔玩。）
6：今次收緊規管，限死銀碼，理論上係可以大大減低外傭借財仔問題。不過有冇bug呢？由於而家話每30日內上信資通，變相data有好成個月咁長嘅時間差，咁借款人極短時間內狂搵二、三、四線財仔，理論上就會偷到雞借幾間，超出銀碼上限。
另一樣要小心係，由於正規嘅財仔，可以借嘅銀碼低，會唔會變相令佢哋，冇得揀之下走去借大耳窿？
7：除咗外傭下，低收入人士債仔可能會出現咩影響呢？通常債仔係借爆銀行，之後先會去restricted license bank、再落就係一線財仔，之後先去到二至五線財仔，最尾就係無牌公司，即係俗稱大耳窿/電話數。
依家信資通既data，基本上只係來自銀行同埋一線財仔。據政府數字，預計新規定之後，會有多340間財仔加入信資通，即是話，已經借到一地街數嘅人，喺銀行同一線財仔面前會無所遁形。咁佢哋會點處理呢批人呢？會唔會影響續期或者call loan？呢一刻係未知。
8：結論係，監管收緊咗，可以減低一批人過度借貸嘅機會。不過，理財教育仍然係好重要，所以如果屋企有請工人姐姐，得閒就灌輸吓佢哋正確嘅理財概念，唔好俾啲優惠吸引咗就走去借錢，借完錢就真係以為自己好有錢，之後就泥足深陷借爆晒。記住，借錢梗要還，咪俾錢中介。
*****
財庫局見到篇文，佢哋inbox咗入嚟講返清楚個policy，發言人表示：
就有關「30天時間差」的憂慮，希望以下補充資料可釋除疑慮：
「現時，「信資通」規定參與的金融機構（包括銀行及放債人），須每30天內上傳無抵押個人貸款借款人的個人信貸資料。
若借款人擬於短時間內向不同金融機構借貸，「信資通」平台會顯示金融機構對該借款人的查詢紀錄及次數。金融機構審批借貸申請時，可一併考慮有關資料，以充分評估借款人的負擔能力。」
